इन्डियन प्रिमियर लिग (आईपीएल) २०२४ अन्तर्गत राजस्थान रोयल्सले पहिलो हार व्यहोरेको छ ।

गए राति भएको खेलमा गुजरात टाइटन्सले राजस्थानलाई ३ विकेटले पराजित गरेको हो ।

पहिले ब्याटिङ गरेको राजस्थानले निर्धारित २० ओभरमा ३ विकेट गुमाउँदै १९६ रन बनाएको थियो । जवाफी ब्याटिङमा उत्रिएको गुजरातले ७ विकेटको क्षतिमा २० ओभरमा १९९ रन बनाउँदै लक्ष्य पूरा गरेपछि गुजरात ३ विकेटले विजयी भएको हो ।

गुजरातका रियान परागले ७६ रनको अर्धशतकीय पारी खेलेका थिए भने सञ्जु सामसन ६८ रनमा नटआउट रहे । त्यस्तै यशस्वी जयसवाल २४ र जोश बट्लर ८ रनमा आउट हुँदा सिमरन हिटमायर १३ रनमा नटआउट रहे ।

गुजरातका उमेश यादव, राशिद खान र मोहित शर्माले १/१ विकेट लिए ।

जवाफी ब्याटिङमा उत्रिएको गुजरातका शुभमन गिलले ७२ रनको अर्धशतकीय पारी खेले । त्यस्तै साई सुदर्शन ३५, म्याथु वेड ४, अभिनव मनोहर १, विजय शंकर १६, राहुल तिवतिया २२ र साहरुख खान १४ रन बनाउँदै आउट भए । राशिद खानले २४ र नुर अहमद शून्य रनमा नटआउट रहे ।

बलिङतर्फ राजस्थानका कुलदीप सेनले ३ विकेट लिँदा यजुवेन्द्र चहलले २ तथा आवेश खानले १ विकेट लिए ।

अंकतालिकाको शीर्ष स्थानमा रहेको राजस्थानको जारी सिजनमा यो पहिलो हार हो । पाँच खेल खेलेको राजस्थानले यसअघि बैंगलुरु, मुम्बई, दिल्ली र लखनउलाई पराजित गरेको थियो ।

६ खेल खेलेको गुजरातको भने यो तेस्रो जित हो । यसअघि गुजरातले मुम्बई र हैदरावादलाई पराजित गरेको थियो भने चेन्नई, पञ्जाब र लखनउसँग पराजय व्यहोरेको थियो ।