जागिर… तीन अक्षरको शब्द
जुन कसैको लागि रमाइलोको पर्यायवाची
कसैका लागि गह्रुँगो भारी
कसैका लागि आफ्नै परिवारको पेट भर्न
बच्चाबच्चीको ‘आँ’ बन्द गराउन ‘जा गीर’ भन्नेजस्तै गरी गर्नुपर्ने काम ।
कसैका लागि भेट्न र पाउन नै गाह्रो र, खोजीमा जीवनभर दौडिरहनुपर्ने तड्पिरहनुपर्ने ।
कसैले यही तीन अक्षरको शब्द जागिरका कारण आफ्नो परिवारबाट टाढिनुपर्ने
कसैले आफ्ना इच्छा, आकाङ्क्षा र स्वतनत्रता त्याग्नुपर्ने ।
कस्तो रैछ यो तीन अक्षरको शब्द ।
कसैले जीवनभर आफ्नो अमूल्य समय विदेशी भूमिमा खर्चिनुपर्ने
कसैले आफ्नो मातृभूमि र परिवारबाट बिरानो हुनुपर्ने ।
कसैलाई आफ्नो मातृभूमि नै छोडेर पलायन बनाइदिने त
कसैलाई आफ्नै भूमिमा पनि अर्काको दासजस्तै भएर बस्नुपर्ने ।
कस्तो बाध्यात्मक परिस्थिति सिर्जना गरिदिने क्षमतावान रैछ यो तीन अक्षरको शब्द ।
प्राकृतिक पक्षपातहरूजस्तै
यो तीन अक्षर शब्दले पनि
कसैलाई चाहिनेभन्दा बढी खुसी दिन्छ त
कसैलाई पाउनुपर्ने खुसी दिन पनि कन्जुस्याइँ गर्छ ।
जेजस्तो भए पनि पाएकाले चाहिँ प्राणभन्दा प्यारो ठान्नुपर्ने
नपाउनेले चाहिँ कहाँ र कहिले पाइएला भनेर धाइरहनुपर्ने ।
वाह ! तीन अक्षरको शब्द जागिर वाह !!