वेस्ट इन्डिजले भारत र श्रीलंकामा जारी आईसीसी टी– २० विश्वकपमा लगातार दोस्रो जित दर्ता गरेको छ ।
वेस्ट इन्डिजले मुम्बईस्थित वानखेडे रंगशालामा बुधबार सम्पन्न समूह ‘सी’ अन्तर्गतको खेलमा इंग्ल्यान्डलाई ३० रनले निरास बनायो ।
वेस्ट इन्डिजले प्रस्तुत गरेको १९७ रनको लक्ष्य पछ्याएको इंग्ल्यान्ड १९ ओभरमा १६६ रनमै समेटियो ।
इंग्ल्यान्डका लागि साम करनले अविजित ४३, ज्याकोव बेथेलले ३३, फिल साल्टले ३०, जोस बटलरले २१ र कप्तान ह्यारी ब्रुकले १७ रन बनाए ।
वेस्ट इन्डिजका लागि गुडाकेश मोतीले ३, रोस्टन चेजले २ तथा अकिल होसेन, रोमारियो शेफर्ड र समर जोसेफले १–१ विकेट लिए ।
त्यसअघि टस हारेर ब्याटिङको निम्तो पाएको वेस्ट इन्डिजले निर्धारित २० ओभरमा ६ विकेट गुमाउँदै १९६ रनको योगफल तयार पारेको थियो ।
वेस्ट इन्डिजका लागि शेर्फेन रादरफोर्डले ४२ बलमा ७ छक्का र २ चौकाको मद्दतले अविजित ७६ रनको योगदान गरे । यसैगरी, रोस्टन चेजले ३४, जेसन होल्डरले ३३, सिम्रन हेटमायरले २३, रोभमन पावेलले १४ रन बनाए ।
इंग्ल्यान्डका लागि जिमी ओभरटन र आदिल राशिदले २– २ तथा जोफ्रा आर्चर र साम करनले १–१ विकेट लिए ।
जितसँगै २ खेलमा ४ अंक जोडेको वेस्ट इन्डिजले सुपर ८ को सम्भावनालाई बलियो बनाएको छ । पराजित इंग्ल्यान्डको समान खेलबाट २ अंक छ ।
यसअघि वेस्ट इन्डिजले स्कटल्यान्ड तथा इंग्ल्यान्डले नेपाललाई पराजित गरेका थिए ।
