नेपालले दोस्रो टी-२० खेलमा वेस्टइन्डिज ए सँग टस हारेर पहिला फिल्डिङ गर्ने भएको छ ।
त्रिवि क्रिकेट मैदान कीर्तिपुरमा भएको टसमा वेस्टइन्डिज ए का कप्तान रोश्टन चेशले टस जितेर पहिला ब्याटिङ गर्ने निर्णय लिएका हुन् ।
दिउँसो सुरु हुने खेलमा दोस्रो जित निकाल्ने लक्ष्यका साथ नेपाल मैदानमा उत्रँदै छ ।
नेपालले यो सिरिजलाई टी-२० विश्वकप तयारीका रूपमा लिएको छ । यो सिरिजपछि नेपाल टी-२० विश्वकप खेल्न अमेरिका प्रस्थान गर्नेछ ।
यसअघि शनिबार भएको खेलमा नेपालले वेस्टइन्डिजलाई ४ बल बाँकी छँदै ४ विकेटले पराजित गरेको थियो । २०५ रनको लक्ष्य पाएको नेपालले ६ विकेटको क्षतिमा १९.४ ओभरमा जित हात पारेको थियो ।